Kæru Samfylkingarfélagar,
Þegar ég kom heim frá framhaldsnámi erlendis fyrir tæpum þremur árum geisuðu í Kópavogi hatrömm átök á milli íbúa og bæjaryfirvalda. Mér ofbauð og ákvað að leggja mitt af mörkum til þess að fá vinnubrögðin bætt, auka lýðræðið og samskiptin við íbúana og vinna gegn spillingunni sem fór ekki framhjá neinum. Að þessu hef ég unnið síðan.
Ég trúði því í upphafi að í flokknum mínum, Samfylkingunni, fyndi ég réttan vettvang til þess að vinna gegn samtryggingu og auka gagnsæi, samvinnu, fagleg vinnubrögð, skýrar leikreglur og skipulagða upplýsingamiðlun. Ég hafði upplifað Samfylkinguna sem félagshyggjuflokk en með daðrandi væng til hægri og gekk þar með að því sem vísu að skiptar skoðanir væru um áherslur og hér ættu sér stað málefnalegar, fjörugar og frjálsar umræður.
Það er hins vegar með trega í hjarta sem ég tek ákvörðun um að yfirgefa þennan vettfang vettvang. Ég átti ekki von á að starf mitt með Samfylkingunni í Kópavogi myndi afhjúpa það að vinnubrögðin sem ég vildi breyta væru viðhöfð þar innandyra. Ég átti ekki von á því að þurfa að kljást og það stundum harkalega við félaga mína á því sviði. Átti ekki von á þeim skorti á skýrum leikreglum, skorti á skipulegum starfsháttum, gagnsæi og faglegum vinnubrögðum, sem ég hef orðið vitni að. Ég gerði mér þó ljóst að við erum öll að vinna flokksstarfið meðfram öðrum aðkallandi störfum og tíminn oft af skornum skammti. Það er hins vegar ekki skynsamleg afsökun, þar sem skýrar reglur og aðferðarfræði myndu auka skilvirkni og létta vinnu. Aukið gagnsæi, umræða og samráð myndi auka traustið milli okkar – ef við höfum ekki tíma fyrir þau vinnubrögð sem lýðræðið krefst, erum við illa stödd.
Valdhafar í Samfylkingunni í Kópavogi virðast enn ekki hafa áttað sig á hlutverki sínu á þeim tímum sem við nú lifum og hversu mikilvæg krafa fólks um breytta stjórnhætti er - í hverju hún felst. Þeir verða að átta sig á því að beiting formleysis við undirbúning og ákvarðanatöku er það sem hefur reynst fólkinu í landinu svo dýrkeypt.
Valdhafar Samfylkingarinnar í Kópavogi þurfa að læra að fagna lýðræðislegri umræðu fremur en að beita þekktum aðferðum til að kæfa ákveðna tegund hennar – gagnrýnina og óþægilegar tillögur. Læra að stimpla ekki umræðu sem neikvæða, niðurrif, ómaklega eða jafnvel yfirgang ef menn eru ekki sammála eða vilja aðrar aðferðir.
Valdhafar í lýðræðislegum stjórnmálaflokki eiga ekki að óttast umræðu og gagnrýni. Slíkur ótti á ekki að stýra þeim til vondra vinnubragða. Þeir verða að geta skilið form frá efni og hafa þroska til láta persónulega andúð ekki þvælast fyrir. Miklu nær væri að fagna félögum sem vilja ganga skipulega og heildstætt til verka, hefjast snemma handa, kallar eftir upplýsingum, spyrja um forsendur, vita hvert stefnt er og marka leiðina þangað.
– jafnvel þó framsetningin sé ekki ákjósanleg, að þeirra mati.
Áhugi og starfsvilji nýs félaga ætti ekki að vera ástæða valdhafa til að pakka í vörn, frysta mál, tortryggja, flytja ákvarðanatöku annað eða upplýsa þau of seint til að umræða geti átt sér stað.
Mér þykir miður að félagar mínir hafi upplifað það sem neikvæðni þegar ég gagnrýndi atburðarrás sem stefndi í óefni. Sú gagnrýni var á köflum harðari en verið hefði ef önnur vinnubrögð hefðu tíðkast og ástæðan var oft ærin.
Ég get hins vegar glaðst yfir því að árangurinn er þegar orðinn nokkur, þótt dýrkeyptur sé.
Baráttuna hef ég samt greinilega goldið með persónulegu orðspori mínu – og það eru félagar mínir sem heimta skattinn. Það hryggir mig að svo er komið.
Ég tel rétt að sleppa dæmum um það sem ég hef tiltekið hér að framan. Aðeins eitt dæmi um dapurleg og óviðunandi vinnubrögð kemst ég samt ekki hjá að nefna.
Þegar Kópavogsbrúin var kynnt fyrir kosningastjórninni, sem átti að vera strategískur ákvörðunaraðili kosningabaráttunnar var ljóst að ákvörðun hafði þegar verið tekin um að þetta yrði aðal kosningamálið. Okkur voru sýndir útreikningar sem skiluðu verkefninu í tapi - en með loforði um að þetta yrði reiknað í hagnað. Atvinnuþáttur hugmyndarinnar var góðra gjalda verður en ég lýsti efasemdum um húsnæðisþáttinn og þörf þeirra sem gætu greitt fullt verð fyrir húsnæðið – og ég var skeptísk á útreikningana, ég sá þar skekkjur.
Svör oddvita og varaoddvita við efasemdum mínum voru nær orðrétt:
það þyrfti ekki endilega að standa við þetta kosningaloforð að loknum kosningum.
Þetta svar toppar í raun allt sem yfir hefur dunið – þessar yfirlýsingar eru ekki sæmandi framboði Samfylkingarinnar, við aðstæður vantrausts og efasemda, þar sem kjósendur eru sannfærðir um að kosningaloforð séu ávallt innihaldslaus með engum ásetningi til efnda. Það eru takmörk fyrir óskammfeilni þegar miklir hagsmunir almennings eru í húfi.
Öskureið lýsti ég því yfir að mér hugnaðist ekki svona viðhorf og vinnubrögð og að ég hefði ekki áhuga á að styðja við innihaldslaus kosningaloforð. Lái mér hver sem vill.
Síðar tókst mönnum að reikna sig upp í örsmáan hagnað af hverri íbúð á 3.-14. ári. Staðreyndin er hins vegar að í þeim útreikningum var svo stór skekkja að rétt niðurstaða er tap af hverri íbúð á bilinu ein til tvær milljónir á ári fyrstu fjórtán árin. Því til viðbótar er hægt að upplýsa að kvaðir Íbúðalánasjóðs á lánveitingum til leiguíbúða gera hugmyndina illframkvæmanlega í þeirri mynd sem kynnt var – brú þarf að vera heil til að vera nothæf. Ég gat og get ekki stutt verkefnið í óbreyttu formi þekkingar minnar vegna – það kölluðu félagar mínir óbilgirni og skort á trausti – sem útilokaði mig frá formennsku í þeirri nefnd sem ég óskaði eftir.
Nú er Samfylkingin komin í meirihluta og enn mikilvægara að kunna - og sýna - vönduð og traustvekjandi vinnubrögð.
Ég hef í vetur gagnrýnt aðferðir og vinnubrögð í þeim tilgangi að ná fram úrbótum. Þær hafa um margt náðst – stundum með harkalegri átökum en ég hefði kosið. Ég get spurt mig - eins og skáldið, hef ég gengið til góðs ....?
En ég gagnrýndi valdið - og valdið hefur aldeilis svarað. Ég get nú stært mig af fjölmörgum nýjum stimplum og nafn mitt verður ekki meðal þeirra sem munu starfa í nefndum á meðal Samfylkingarinnar í Kópavogi næstu fjögur ár.
Ég gagnrýndi valdið - og valdið svaraði.
Skilaboðin eru skýr: Berufsverbot
Við þær aðstæður er mér gert ómögulegt að vinna. Ég mun því nú breyta áherslum mínum, sinna öðrum málum fremur en að slást við valdið og vandann innan Samfylkingarinnar í Kópavogi. Ég eftirlæt öðrum það vandasama verk að ná fram raunverulegu gagnsæi, samvinnu, faglegum vinnubrögðum, skýrum leikreglum og skipulagðri upplýsingamiðlun, því það veit sá sem eitthvað veit, að þar er mikið starf óunnið, þrátt fyrir yfirlýsingar um annað.
Vitur maður ráðlagði mér, að draga andann djúpt og yfirgefa ekki sviðið í flýti. Ekki gefa eftir víglínu sem mikilvægt væri að verja - þá myndi rimmunni ljúka með uppgjöf og þannig losa gagnaðilann við „vandamálið“.
Þetta er gott ráð. Ég því mun því ekki segja mig úr Samfylkingunni eða frá þeim trúnaðarstörfum sem ég hef verið kjörin til. Ég er fyrsti varabæjarfulltrúi Samfylkingarinnar í Kópavogi og tek sæti á þeim bæjarstjórnarfundum sem mér ber. Samkvæmt lögum ber mér skylda til að taka sæti og kjörnum bæjarfulltrúum ber samkvæmt sömu lögum skylda til þess að kalla mig inn í forföllum þeirra. Þá og því aðeins að ég forfallast hafa þau heimild til þess að kalla til aðra varabæjarfulltrúa.
Ég óska kjörnum bæjarfulltrúum Samfylkingarinnar í Kópavogi velfarnaðar og vona að þau læri af reynslunni og beiti ekki sömu vinnubrögðum í meirihlutastarfinu og ég hef orðið vitni að síðastliðna fjóra mánuði.
Með því mun ég fylgjast – reynslunni ríkari.
Viðbót að morgni 15.06: Í uppkasti að þessari bloggfærslu var eftirfarandi setning: "Ég er hluti meirihlutans og vænti þess að sitja meirihlutafundi og taka þátt í því meirihlutasamstarfi sem nú fer af stað." Ég tók hana út því ég taldi mig ekki geta sett fram þá fullyrðingu einhliða.
Hún stendur af minni hálfu.
Skýringar óskast
Sæl Elfur,
ég er afar tvístígandi eftir þennan lestur. Hvað ertu að segja? Er það meiningin hjá þér að starfa í stjórnarandstöðu í meirihlutanum? Ef svo er þá er ég meira undrandi en orð fá lýst.
Þú hefur skrifað og sagt margt einkar athyglisvert og jákvætt hér á síðuna þína. Sumt af því er jafnvel byltingarkennt, s.s. heiðarleikasáttmálinn, sem mér finnst virkilega jákvætt skref í áttina að heiðarlegum vinnubrögðum.
Ég spyr mig hvort mér finnist þessi skrif þín heiðarleg? Svarið sem ég finn hjá mér er bæði og. Það er heiðarlegt af þér að segja þína skoðun algjörlega umbúðalaust. En annað er kannski ekki eins heiðarlegt, ef ég les það rétt, að þú teljir þig ekki geta unnið með flokknum en ætlir samt að vera þar. Slíkt finnst mér ekki heiðarlegt.
Ég þekki það af öðrum vettvangi hvernig það er að vera ekki alltaf í takti við forystuna. En alltaf tel ég mig hafa unnið þar af heiðarleika - ég sagði mína skoðun innan fjögurra veggja á fundum stjórnar og þeirra sem ég var að vinna með á hverjum tíma, en út á við stóðum við sem ein heild. Oft og iðulega hef ég spurt mig, átti ég ekki að standa upp og segja frá því sem fram fór á fundum þannig að grasrótin vissi hvað átti sér þar stað. En fundir þar sem fáir eru boðaðir eru oftar en ekki trúnaðarfundir og það er ætlast til þess að þau mál sem þar eru rædd fari ekki lengra. Þar geta menn sem starfa saman að ákveðnu markmiði rifist um leiðir og aðferðir, en trúnað á maður að halda og það er lykill að því að starfa af heilindum og heiðarleika.
Slíku hefði ég búist við af þér.
Skrifin hér að ofan eru löng og einni spurningu er alveg ósvarað, ertu hluti af liðinu eða ertu að spila sóló?
Með kærri kveðju,
Ingó
Vandrataðir vegir
Heil og sæl Elfur.
Leitt að þú skulir hellast úr lestinni með þessum hætti.
Ég trúi því nú samt að þú eigir eftir að sjást á nýjan leik.
Gangi þer annars vel.
Arnþór Sig.
Örugglega ekki Ingó
Ég trúi því ekki á hana Elfi að stilla sér upp í stjórnarandstöðu. Ég er alveg viss um að hún breytir ekki sínum hugsjónum. Jafnaðarmennska er henni í blóð borin. Er hún ekki einmitt að segja að hópurinn hafi hafnað henni? Vill hópurinn hafa hana með? Sem jafningja?
Ef Elfur styður ekki þá
Ef Elfur styður ekki þá bæjarfulltrúa sem hún á að vera varabæjarfulltrúi fyrir, væri heiðarlegast af henni að víkja og láta einhvern sem vill og getur unnið með nýjum meirihluta gegna starfi fyrsta varabæjarfulltrúa.
Hún segir að sér sé "ómögulegt að vinna" undir þessum kringumstæðum, en ætlar samt að sitja sem fastast. Er það hinn nýi heiðarleiki sem hún boðaði?
Við Kópavogsbúar þurfum síst af öllu nýjan meirihluta sem líður fyrir innbyrðis deilur og ósamkomulag frá fyrsta degi. Það væri sterkari og heiðarlegri leikur hjá Elfi að taka ekki sæti varabæjarfulltrúa og stíga til hliðar, geti hún ekki náð samkomulagi við félaga sína.
Spurningin vakir samt enn Jóna
Jóna, ég veit ekki nema brot af því hvað er að gerast en þessi skrif koma mér óendanlega mikið á óvart og ég er óendanlega vonsvikin ef staðan er eins og Elfur lýsir henni.
Ég hef starfað með þessum hópi í fjögur ár og á mjög erfitt með að trúa því að hópurinn vilji ekki hafa Elfi með sem jafningja. Á fjórum árum hef ég upplifað það að vera hluti af samhentum og samstæðum hópi, þó svo að ég hafi verið fimmta á lista og fyrsti varamaður, svipuð staða og er hjá Elfi í dag. Vissulega hef ég ekki alltaf verið sammála öllu, en ég hef lýst þeim skoðunum mínum og stundum haft mitt fram, stundum ekki. Þannig er lífið!
Það sem ég sá af kosningabaráttunni var samstíga hópur sem setti fram hugmyndir, markmið og leiðir að því að fella sitjandi meirihluta til 20 ára. Það markmið náðist. Vissulega heltist einn bæjarfulltrúi úr lestinni en það gerðist á landsvísu að Samfylkingin tapaði fylgi þannig að það má líta á niðurstöðu kosninganna sem ákveðinn varnarsigur. Það þarf að fara fram málefnaleg skoðun innan flokksins á því hvað brást og þar verða menn að geta tekist á án þess að menn heltist úr lestinni af minnsta eða mesta tilefni.
Annars er ég ekki mikið til í að ræða þetta hér á opinberum vettvangi. Mér finnst að það eigi að eiga sér stað umræða innan flokksins, líkt og ég lýsti hér að ofan. En Elfur opnaði á þessa umræðu og ég gat ekki á mér setið að lýsa mínum tilfinningum þegar ég las pistilinn hennar. Einnig bíð ég svars frá henni og veit að það mun koma.
kv. Ingó
Hver er Jóna
Annars væri líka gott að vita hver Jóna er?
Til áréttingar
Ég sat fyrsta hálftíma bæjarmálafundar í kvöld og samþykkti meirihlutasamning verðandi meirihlutaflokka. Ég hef engin áform um annað en að veita þeim málefnum sem í málefnasamningnum eru, fullan stuðning enda góður samningur þar á ferð.
Frásögn mín hér í kvöld snýr að vinnubrögðum þeirra sem með valdið fara í Samfylkingunni í Kópavogi. Hún er ekki skrifuð til þess að fella nýjan meirihluta, sem ég hef enda ekki í mínu valdi að ráða hvort er eða fer. Hún er skrifuð til þess að skýra fyrir félögum mínum hvers vegna ég verð ekki til staðar og að hvaða leyti ég verð ekki til staðar.
Það er alveg rétt sem kemur fram hérna ofar í athugasemdum að jafnaðarmennskan er sú stefna sem ég styð og mun halda áfram að styðja. Það á ekki að koma neinum á óvart.
Ég skil þig svo að .....
Ég skil það nú svo að Elfur ætli einmitt að fara að þeim ráðum sem maðurinn vitri ráðlagði henni, og hún segir frá í þessu bloggi.
Hún ætlar ekki að yfirgefa Samfylkinguna, né að segja sig frá þeim trúnaðarstörfum sem við kusum hana til. Ég kaus þig Elfur og Samfylkinguna eftir að hafa hlustað á þig á fundi fyrir prófkjörið í vetur, mér fannst ég finna samhljóm við hugsjónir þínar, og þann eldmóð sem þú sýndir á fundinum, og í erindi þínu, og síðar í skrifum hér á blogginu. Og eftir að ég fór að fylgjast með bloggi þínu, fékk ég aftur áhuga á pólitík, því ég fann í þér þann Jafnaðarmann sem ég hef lengi beðið eftir. Þarna var nú loks kominn frambjóðandi að mínu skapi, frambjóðandi með kjarngóða jafnaðarstefnu, og eldmóð til að fylgja henni eftir. Þessvegna er ég líka handviss um að þú ætlir ekki að fara að vinna með minnihluta eins og Ingó heldur. Ég þykist sjá það sjálfur að það mundir þú aldrei gera. En ég er glaður yfir að þú haldir áfram að vera sjálfri þér samkvæm, og að þú látir ekki kúga þig til hlýðni, svoleiðis konur fíla ég. Og ég er feginn að þú skulir koma fram og segja okkur öllum flokksmönnum, hvað að er, í Samfylkingunni, því það eflir okkur, og Ingó það er hollt fyrir okkur strákanna að læra það að "hreinskilni er vegurinn að varanlegri velgengni". Það að þora ekki að segja sannleikann af hræðslu við að falla niður vinsældalistann er skammgóður vermir, þú hangir kannski á toppnum nokkrum dögum lengur en þá verður fallið líka enn stærra, og skellurinn meiri. Hættum þessari þöggun við vitum svo vel hvert það leiðir, það ætti hrunið að hafa kennt okkur. Förum að tala saman samfylkingarmenn. Finnur Sig.
Hún segir eiginlega hvoru tveggja
Í fyrrihlutanum segir Elfur:
"Það er hins vegar með trega í hjarta sem ég tek ákvörðun um að yfirgefa þennan vettfang vettvang. Ég átti ekki von á að starf mitt með Samfylkingunni í Kópavogi myndi afhjúpa það að vinnubrögðin sem ég vildi breyta væru viðhöfð þar innandyra"Sem segir eiginlega að hún sé að yfirgefa bæjarmálaflokkinn. En síðar segir hún að hún ætli að rækja stöðu sína sem varabæjarfulltrúi.
Ömurlegt að svona skuli gerast. Finnst reynar að Elfur sem ég kaus líka í sæti skuli vera svona óþolinmóð og reyna ekki að koma á þeim umbótum sem henni þykir þurfa í flokkinn. Reyndar ömurlegt sem hún hefur eftir fólki varðandi Kópavogsbrúnna.
En finnst það full bratt að koma inn í starfið með hvelli og halda að það gangi bara átakalaust í gegn. Þannig hluti þarf að vinna að í hópnum og fá fylgjendur að sínum máli. Þetta tekur tíma sem og að virða það að aðrir hafi aðra skoðun.
Trúnaðarbrestur?
Er það ekki alvarlegur trúnaðarbrestur að hafa eftir samtöl við oddvita listans og varaoddvita (þess sem var í 2. sæti væntanlega) sem fóru fram á lokuðum fundi kosningarstjórnar? Er hægt að halda áfram að starfa sem varabæjarfulltrúi eftir slíkan trúnaðarbrest?
Ég er nú ekki sammála þér
Ég er nú ekki sammála þér Magnús um að hún Elfur ætli bæði að fara og vera, hún segir hinsvegar að hún ætli ekki að starfa á vettvangi Samfylkingar í Kópavogi, og það tregar hún.
En hún segist ekki ætla að segja sig úr Samfylkingunni þrátt fyrir að hún ætli ekki að vinna í flokksstarfi í Kópavogi, sem hún hefur gert ötullega fram að þessu.
Elfur segir líka að hún ætli að vinna og sinna vel þeim trúnaðarstörfum sem hún var kosin til þ.e. 1. varamaður í bæjarstjórn.
En Elfur segir frá því að henni hafi ekki gengið sem skyldi að ná fram breyttum vinnubrögðum innandyra hjá Samfylkingunni í Kópavogi, og það finnst mér miður því ég hefði haldið að þar mundu þeir í Samfó notfæra sér þá þekkingu og færni Elfar til róttækra breytinga í anda jafnaðarstefnunnar, sem hún sýndi svo glögglega á opnum fundum í kosningabaráttunni. T.d. með því að kjósa Elfi í þær nefndir sem sinna þeim verkefnum sem hún setti á oddinn í kosningabaráttunni.
En hvað gerist henni er ekki treyst, ég vil fá skýrari rök hversvegna Samfylkingarfólk treystir ekki jafn öflugri baráttu manneskju fyrir réttlátara samfélagi, og hugmyndum hennar um hvernig fara megi að því að breyta það og bæta sem miður hefur farið á undanförnum árum.
Er henni er ekki treyst afþví að hún hafði gagnrýnt félaga sína fyrir að koma ekki hreint fram.
Elfur nefnir eitt atriði, þar sem hún varar félaga sína í Samfó við því , að leggja ekki fram "öll" málsgögn í samningum um meirihluta. - Á mannamáli leyna staðreyndum -. Ég skil vel að Elfur hafi ekki viljað una því, hún sem hefur barist fyrir breyttum vinnubrögðum í bæjarstjórn, og bauð sig fram til að leggja sitt af mörkum til að fella fyrrum meirihluta, situr svo uppi með félaga innan síns flokks sem ætlar að haga sér nákvæmlega eins og fyrrverandi meirihluti gerði, beita brögðum og blekkingum, í stað sannleika og gegnsæis. Þegar ég las þennan pistil Elfar þá var fyrsta hugsun mín, auðvitað hefur ekkert breyst þó að Flosi sé hættur, það eru enn sömu gömlu vinnubrögðin, nema nú er ekki hægt að kenna Flosa um. Og Ingó þorir enn ekkert að segja, af hræðslu við hvað?
Við hvern ertu hræddur núna Ingó, ég sé að þú hefur setið sem 1. varamaður í bæjarstjórn en ekki þorað að segja frá því sem þér mislíkaði, en, þegar þú mótmæltir í litlu bæjarfulltrúaahópnum úr Samfó varstu settur út af sakramentinu, ég geri ráð fyrir að þú hafir setið þarna fyrir Samfylkinguna í Kópavogi.
Og Gestur, við hvaða lög, varðar það aftur, að blekkja, til að ná völdum?
En viljum við svoleiðis fólk við völd nú árið 2010, þegar ég kaus um daginn hélt ég að ég væri að kjósa nýja og betri stjórnunarhætti í Kópavogi. Ég vona svo innilega að hinir bæjarfulltrúarnir í meirihlutastarfini í Kópavogi haldi sínu striki og fái Elfi til liðs við sig.
Ég hef talað eitthvað óskýrt!
Ég sagði að hún ætlaði ekki að starfa með bæjafulltrúum Samfylkingar og bæjamálaflokknum og síðar hefði hún talað um að rækja skildur sínar sem varabæjarfulltrúi.
Ég hef í morgun aðeins kynnt mér málin og finnst eins og ég sagði áður að Elfur sé kannski full bráðlát. Það var ekki eins og henni væri haldið utan við nefndarstörf eins og fólk gæti lesið út úr pisli hennar. En finnst vanta í hana þolinmæði og að þrauka smá stund. Fólk hoppar ekki inn í neinn félagsskap og tekur hann yfir. Fólk þarf að vinna sínum málum stuðning og sanna sig. Elfur hefur óneitanlega menntun sem nýtist fólk vel í bæjarstjórn en það segir ekki allt. Ef hún ætlaði að umbylta öll þá átti hún að segja það strax. Það voru 3 bæjarfulltrúar sem náðu kjöri þeirra sjónarmið hljóta að gilda líka.
Það leysir yfirleitt engan vanda að rjúka upp við fyrstu hindranir og lýsa frati í aðra. Og þrátt fyrir skoðanir og vilja einstaklings þá er það meirihluti sem ræður. Og ef maður virkilega trúir á a maður hafi rétt fyrir sér þá vinnur maður að því maður skellir ekki hurðum strax að baki sér! Það gerir leiðina til baka erfiðari. Og oft eru tvær hliðar á hverju máli
Var ég búin að segja ykkur frá stimplunum?
Mér sýnist Magnúsi (sem ég veit ekki betur en sé barnsfaðir Guðríðar Arnardóttur oddvita) hafa tekist ágætlega upp í stimplagerðinni. Ætli hann hafi ekki komið vel þriðjungi þeirra stimpla sem í mín eyru hafa borist í tvær hnitmiðaðar málsgreinar.
Geri aðrir betur.
Snýst þetta þá allt um
Snýst þetta þá allt um nefndarsæti? Hefði Elfur ekki sagt neitt ef hún hefði fengið sæti í nefnd?
Ja hérna hér.
Er ekki komið nóg af
Er ekki komið nóg af þöggun?
Það er fernt í pistlum þeirra sem gagnrýna Elfi fyrir ákvörðun hennar og skrif sem ég vil gera að umtalsefni. Það nefnir:
1. Trúnaðarbrest (Gestur)
Gestur, það er kominn tími til að fólk þegi ekki yfir ómerkilegum
vinnubrögðum þeirra sem með völdin fara. Landið væri betur sett
ef stjórnmálafólk hefði haft kjark til þess í ríkari mæli að afhjúpa
slík vinnubrögð. Þegar forystufólk segir við kynningu stærsta
kosningaloforðs flokks síns í kosningabaráttu að það þurfi ekki endilega
að standa við það - þá er það háalvarlegur skortur á siðferði.
Fólk krefst gagnsæis og heiðarleika núna - um það var m.a. kosið.
Höfum það í huga að við þessi orð reiddist Elfur, eins og hún tekur fram
í pistli sínum og las yfir fólkinu. Það er meðal annars sá reiðilestur sem
þetta sama fólk básúnar út sem dæmi um yfirgang Elfar.
Hvernig stendur trúnaðurinn þá Gestur?
Er það trúnaðarbrestur að segja frá því?
Eða virkar trúnaðarbrestur bara á eina hlið?
2. Dregur heiðarleika hennar í efa (Ingó)
Er það óheiðarleiki hjá Elfi að beygja sig undir það þegar valdafólkið
í flokki hennar útilokar hana frá eðlilegu starfi?
Áttaðu þig á því, Ingó, að fólkið í bænum kaus þennan flokk með Elfi
í 4. sæti. Við það fólk hefur hún skyldur samkvæmt lögum.
Þetta veistu Ingó - og ekki væna aðra um óheiðarleika.
Ég veit nefnilega að þú þekkir þessi lög vel, vinnandi hjá Sambandi
íslenskra Sveitarfélaga. Það er óheiðarleiki hjá þér að væna Elfi um hluti
sem þú veist mæta vel sjálf að eru ekki réttir, jafnvel þótt þú gangir
greinilega þeirra erinda að reyna að fá hana til þess að hætta afskiftum
af stjórnmálum í Kópvogi. Mig rennir í grun, miðað við róginn,
að það sé dagskipunin.
3. Ásaka hana um að ætla að taka félgsskapinn yfir í einum grænum
(Magnús eftir að hafa kynnt sér málin, væntanlega hjá þeim sem taka
orð Elfar til sín.)
Magnús eftir hverjum hefurðu það að Elfur hafi reynt að taka flokkinn
yfir í einum grænum? Þetta er nú eiginlega fyndið.
Líklega erum við þarna komin að ákveðnum kjarna
- var valdahópurinn hræddur við afl hennar- hræddur um afhjúpun?
Valdamissi?
Ekki ólíklegt að það sé þess vegna sem það kýs að úthrópa hana
og stimpla líkt og gert er í einelti.
Aðferðir sem notaðar eru til að einangra fólk eru að fylla aðra vantrú
og notaðar í pistlum hér að ofan og víðar.
Dettur engum í hug að fylgni Elfar við mál (valdhafarnir básúna það sem
yfirgang) hafi verið vegna þess að hlutirnir voru ekki í lagi
- ekki einu sinni til skammtímanotkunar.
4. Reyndar bætir Magnús því líka við að ekki hafi henni verið
"haldið utan við nefndarstörf" eins og hann kýs að orða það.
Það er klókt að orða þetta svona - spurning hvaðan það er komið.
Nei, Magnús henni var ekki haldið utan við nefndarstörf.
Henni var boðið að vera fulltrúi (ekki formaður) í nefnd sem ráðgert
er að leggja niður eða sameina öðrum, jafnréttisnefnd.
Það er rétt að taka það fram að Elfur er formaður kvennahreyfingar
Samfylkingarinnar á landsvísu, gott til afspurnar að bjóða henni nefndina
og leggja hana svo niður.
Elfur er fjórða manneskja á lista stærsta flokksins í nýjum meirihluta.
Hún er lögfræðingur og viðskiptafræðingur að mennt auk yfirgripsmikillar
þekkingar og reynslu í upplýsingatækni. Hefur unnið hjá stjórnsýslu,
fjármálafyrirtækjum og einkageira.
Ég spyr þig Magnús þykir þér þetta réttlátt meðferð af hálfu félaga Elfar,
valdhafanna í flokknum?
Áður en þú svarar, taktu þá með í reikninginn að manneskjum í fimmta
og sjötta sæti og auðvitað einum í viðbót sem ekki er á listanum
var boðin formennska í nefndum - ekki Elfi.
Á þessum tímapunkti sem þetta gerðist hafði greinin hér að ofan ekki
birst og Elfur ekki sagt sig úr samstarfi. Hún mætti á fund
Samfylkingarinnar í gærkvöldi og samþykkti málefnasamþykkt
meirihlutans. Eftir að nöfn fulltrúa flokksins í nefndum voru lesin upp var
ljóst að hún hafði verið sett í útilokun - berufsverbot, eins og hún nefnir
hér að ofan.
Falleg framkoma - ekki satt?
Það á enginn heimtingu á
Það á enginn heimtingu á formennsku í nefnd, sérstaklega ekki einstaklingur sem þrátt fyrir góðar gáfur og menntun hefur ekki náð kjöri til bæjarstjórnar. Bæjarfulltrúarnir ráða því að mestu hverjir eru í nefndum. Þannig hefur það tíðkast í öllum flokkum og sveitarfélögum sem ég þekki til. Það er því engin útilokun þó að varabæjarfulltrúa sé ekki boðin formennska.
Að mínu mati hefði hún átt að brjóta odd af oflæti sínu og þiggja nefndarsætið.
Það er rangt að málið snúist
Það er rangt að málið snúist um nefnd
Ágæti Kópavogsbúi
Þvílíkur hroki - þvílíkar dylgjur sem felast í þessum orðum þínum.
Í fyrsta lagi eru það þín orð að gefa í skyn að Elfur hafi heimtað formennsku í nefnd. Það gerði hún ekki, þótt einhverjir vilji láta það líta þannig út.
Í öðru lagi voru tveir einstaklingar "sem þrátt fyrir góðar gáfur .... náðu ekki kjöri til bæjarstjórnar", og voru fyrir neðan hana á lista, settir í formennsku fyrir nefndum, reyndar með minni menntun en Elfur. Þar að auki einn sem ekki var á lista en hefur líka "bæði góðar gáfur og menntun". Þú getur svo sjálfur velt því fyrir þér hvort þessir einstaklingar hafi spurt margra óþægilegra spurninga undanfarið eða reynt að leiðrétta mistök þeirra valdhafa sem fulltrúalistanum réðu.
Í þriðja lagi er það auðvitað rétt að bæjarfulltrúar (stór hluti valdhafa) Samfylkingarinnar í Kópavogi ráða því að mestu hverjir eru í nefndum. Afhjúpar það ekki stöðuna?
Lestu hins vegar reglur samfylkingarinnar. Bæjarfulltrúar gera tillögu og bera hana upp á fundi bæjarmálaráðs. Reglurnar sýna vilja til þess að lýðræði sé í heiðri haft. En nú spyr ég þig af því að þú gefur í skyn víðtæka þekkingu á sveitarstjórnarmálum um allt land - veistu til þess að tillögum bæjarfulltrúa hafi verið hafnað af bæjarmálaráði kvöldið fyrir fyrsta bæjarstjórnarfund? ég ítreka - seint að kvöldi fyrir fyrsta bæjarstjórnarfund?
Það er meðal annars svona vinnubrögð sem Elfur deilir á.
Ég bendi á að oftlega er farin sú leið að biðja um frest á kosningu í nefndir sem ekki hefur tekist að manna í tæka tíð.
Valdamenn kunna allar þessar reglur.
Í fjórða lagi er aðalatriði málsins alls ekki hvort Elfur fékk formennsku í nefnd eins og sjá má af grein Elfar - þetta snýst um óviðunandi vinnubrögð sem kristölluðust í framkomunni í gær og þetta snýst um atlögu valdahóps að félaga sem einhverra hluta vegna virðist ógna þægindum valdahópsins.
Það er auðvitað í anda þeirra vinnubragða að reyna að láta þetta líta út eins og það snúist um formennsku í nefnd.
Fyrirsjánleg tilraun sem auðvitað heppnast - valdahópurinn hefur tögl og hagldir.
Mér leikur forvitni á að vita hvers vegna hann leggur svona ofuráherslu á að Elfur segi af sér - sem hún hefur ekki lagaheimild til.
Er hún ekki búin að lýsa því yfir að hún styðji málefnasamning nýs meirihluta? Hver er þá ógnin?
Skýr heimsmynd
Það hlýtur að vera gott að hafa skýra heimsmynd Kópavogsbúi. Það getur ekki verið að Elfur hafi eitthvað til síns máls hún er bara með heimtingu á formennsku í nefnd sem bæjarfulltrúarnir ráða yfir. Var það Elfur sem "þrátt fyrir góðar gáfur og menntun" náði ekki kjöri til bæjarstjórnar? Stjórnaði hún kosningabaráttunni eða var það Samfó sem klikkaði, valdhafarnir sem hún talar um.
Bara lítil en mikilvæg sönnun
Bara lítil en mikilvæg sönnun þess að Elfur virðist hafa haft ástæðu til að gera athugasemdir við Kópavogsbrúarframsetningu Samfylkingarinnar er þessi klausa í málefnasamningnum.
"Kanna hagkvæmni þess að Kópavogsbær komi að uppbyggingu hálfkláraðs húsnæðis í bænum og að koma á traustum leigumarkaði "
Fulltrúar hinna flokkanna eru henni greinilega sammála að þetta þurfi að skoða nánar áður en af stað er farið.
Úps er eitthvað misskilinn
Úps er eitthvað misskilinn hér. Og biðst undan því að ég fái á mig stimil þó ég sé barnsfaðir Guðríðar. Gerir það mig óhæfan til að tjá mig um málið. Elfur þú veist líka að Guðríður er hamingjusamlega gift öðrum og okkar sambandi lauk fyrir nærri 20 árum. Ég hef búið lengur í Kópvogi en hún, kosið jafnaðarmenn lengur en hún. Ég perónulega var byrjaður að tjá mig gegn fyrri meirihluta í Kópavogi áður en ég viss að hún væri einu sinni í Samfylkingunni. Og ég mun ekki hika við að gagnrýna hana ef ég tel að hún sé ekki að standa sig.
Upplýsingar þetta upphlaup fékk ég ekki frá henni. Ég var að ræða við félaga minn sem er í Samfylkingunni í Reykjavík þega hann benti mér á þessa færslu þína. Og upplýsingar mínar eru komnar frá honum eftir fólk sem hann þekkir í Kópavogi. Bara svona til að hafa þetta á hreinu.
Ég var í raun að hvetja þig til að endurskoða hug þinn varðandi þessi sambandsslit þín við Bæjarstjórnarflokk samfylkingarinar eins og ég las þetta í fyrra kvöld. Var að segja að fólk getur ekki reiknað með þrátt fyrir að vera mjög vel menntað að það eitt og sér skapi fólki eitthvað sérstakt forskot þegar komið er að vinnu fyrir flokkinn. Og eins að benda á að góðir hlutir hafa tilhneigingu til að taka tíma.
Ætlaði ekki að setja á þig neina stimpa. Sorry ef þú lest það út úr þessu. En skv. pistlinnum fannst mér viðbrögð þín við það að fá ekki formannssæti í einhverri nefnd vera full yfirdrifinn.
sbr:
"það kölluðu félagar mínir óbilgirni og skort á trausti – sem útilokaði mig frá formennsku í þeirri nefnd sem ég óskaði eftir"Hefði ekki verið ráð að skoða aðrar nefndir sem alveg örugglega stóðu þér til boða og reyna svo að vinna þínum viðhorfum fylgi næstu mánuði eða ár.
Og ef fólk er að fara fyrir alvöru í stjórnmál þá þarf það stundum að gefa sér tíma til að breyta því sem því finnst ekki í lagi. T.d. í Kópavogi.
Ítreka að ég setti þig í 4 sæti í forvalinu af því að ég taldi að þú gætir komið með góða hluti endurskipulagningu í bænum sem ekki er vanþörf á.
En það vilja væntanlega allir sem voru kjörnir gera líka.
En nú er best að hætta áður en ég verð misskilinn meira
Valur
Valur, hver ert þú - heitir þú kannski eitthvað annað en Valur. Þorir þú ekki að koma fram undir nafni?
Já og Finnur Sig - Hver ert þú? Ert þú í sama feluleiknum og Valur?
Þið heimtið opna og gegnsæja stjórnsýslu - en þorið ekki að standa við orð ykkar undir eigin nafni. Já það er gott að vera "Óskar Nafnleyndar"
Valur og félagar: Ef þetta
Valur og félagar:
Ef þetta snýst ekki um nefndaformennsku, af hverju er Elfur þá að minnast á það að afstaða hennar hafi útilokað hana "frá formennsku í þeirri nefnd" sem hún "óskaði eftir"?
Ef þetta snýst ekki um nefndasæti, af hverju tekur Elfur þá sérstaklega fram að nafn hennar verði "ekki meðal þeirra sem munu starfa í nefndum á meðal Samfylkingarinnar í Kópavogi næstu fjögur ár."
Ef þetta snýst ekki um nefndir, af hverju talar Elfur þá um "Berufsverbot" eða vinnubann? Henni er ekki bannað að stunda sína launavinnu. Henni er ekki bannað að vinna sjálfboðastörf fyrir sinn flokk eða aðra. Henni er ekki bannað að blogga. Það eina sem gerðist var að hún komst ekki í það nefndarsæti sem hún vildi.
Það er ekki annað að sjá en að þetta snúist einmitt um nefndir og nefndasæti. Hún fékk ekki það sem hún vildi. Þá er rokið í bloggið og fjölmiðla með ásakanir.
Ekki finnst mér það stórmannlegt.
Í grein Elfar kemur fram að
Í grein Elfar kemur fram að afstaða hennar í Kópavogsbrúarmálinu hafi orðið til þess að hún fékk ekki þá nefnd sem hún óskaði eftir. Taktu eftir - ÓSKAÐI EFTIR - Það er einfaldlega rangtúlkun að þess vegna skrifi hún. Hún gerði alls enga athugasemd við að Pétur fengi þá nefnd, þótt hann hafi hvorki reynslu né menntun í þau mál - en hann var ofar henni á framboðslista. Það eru einmitt þessi vinnubrögð meðal annarra sem hún deilir á - og greinilega af nauðsyn.
Þau vinnubrögð til dæmis að útiloka hana sem mögulegan kost í nefnd sem fjallar um málefni á hennar sérsviði, af því að hún gerði athugasemdir við tillögu sem gekk ekki upp og reiddist fádæma siðlausu svari oddvitanna.
Ef þú lest grein Elfar og mínar hér að ofan með öðrum gleraugum en hingað til þá sérðu um hvað málið snýst.
Það var var orðið lýðum ljóst að fótgönguliðssveit valdhafanna er í öflugum skotgrafarhernaði gegn Elfi, þegar Elfur setti sína grein í loftið. Hversvegna valdhöfunum er svo mjög í mun að losna við hana er mér og öðrum umhugsunarefni. Eins og annars staðar hefur komið fram í dag þá átti hún að vera á segðunarskilorði af hálfu valdhafanna til ármóta.
Ef hún yrði þæg þá fengi hún formennsku í félagsmálaráði.
Hvílík vinnubrögð. Finnst þér þetta fullorðnu fólki sæmandi?
Villa í grein minni
Villa í grein minni leiðréttist hér með:
Segðunarskilorð á að vera hegðunarskilorð, skilist þannig að ef hegðun er ekki eins og valdhöfum líkar þá verður ekki um formennsku í viðkomandi nefnd að ræða. Berufsverbot.
Það er þín túlkun að boð um
Það er þín túlkun að boð um formennsku eftir áramót þýði hegðunaskilorð.
Fullorðnu fólki gæti dottið í hug að það væri í ekkert óeðlilegt, þegar nýr meirihluti er að taka við og nýir fulltrúar sem ekki hafa starfað áður í nefndum eru á listunum, að þá leiddi reyndari aðili nefndarstarfið í stórri og mikilvægri nefnd í upphafi en nýliði tæki svo við eftir nokkra mánuði.
Jafnvel væri hægt að kalla slíkt vandaða stjórnsýslu.
Varaðu þig nú - nú vænir þú
Varaðu þig nú - nú vænir þú Guðríði, Hafstein og Pétur um vonda stjórnsýslu með þvi að afhenda Pétri, ungum, óreyndum og ekki með menntun í þessum efnum, atvinnu- og upplýsinganefnd?
Æ æ aumingjans kratarnir mínir.
Ekki byrjar það vel hjá ykkur að vera komnir í alvöru pólitík eftir 20 ára hvíld. Það gengur nú hinsvegar oft til svona þegar á á að herða og meirihlutinn er tæpur. Þið hefðuð kannski átt að hafa garminn hann Ómar með úr því að íhaldið er svona mikið fíbjakk.
Þið hafið kannski heyrt söguna af unga nýkjörna breska þingmanninum, sem fékk eldri þingmann til að sýna sér bresku málstofuna áður en þinghald hæfist. "Hérna sitjum við og hinu megin við ganginn sitja andstæðingarnir. "
" Mikið hlakka ég til að sitja hérna í fremstu röð og takast á við óvinina hinu megin við ganginn " sagði þá ungi maðurinn.
" Óvinina ? Nei sonur sæll, þetta er ekki rétt hjá þér"sagði þá eldri þingmaðurinn, " Andstæðingarnir sitja þarna. Óvinirnir sitja hérna fyrir aftan þig."
Innanflokksátök eru það sem foringjar allstaðar verða að búa við. Sá einn er foringi sem getur sett niður deilur í eigin flokki og haldið lokinu á suðupottinum. Bjarni Benediktsson sagði eitt sinn eitthvað á þessa leið: "Það er bara erfitt að vera forsætisráðherra og berjast við erfiðleikana. En það er miskunnarlaust starf að vera formaður í Sjálfstæðisflokknum."
Gallinn við ykkir jafnaðarmenn er sá, að þið eruð svo miklir ójafnaðarmenn í ykkur. Saga vinstrihreyfingarinnar á Íslandi sannar þessa fullyrðingu við hlutlausa athugun. Hvergi hafa deilur risið hærra en þar. Nægir að nefna Þjóðvaka, Bandalag Jafnaðarmanna, Á rauðu ljósi, Samfylkinguna og VG. Því miður eru vinstri menn oft ekki sammála um neitt annað en að vera á móti Sjálfstæðisflokknum. Ingibjörg Sólrún sannaði það að mínu viti, að án óvinarins í Sjálfstæðisflokknum þreifst hún illa í pólitík.
Gangi ykkur sem best að ná sáttum svo að bænum okkar verði vel stjórnað.
Atvinnu- og upplýsinganefnd
Atvinnu- og upplýsinganefnd er varla jafn veigamikil nefnd og félagsmálanefnd, eða hvað? Ekki það að ég ætli að svara fyrir aðra, en Valur er hér fastur í hártogunum.
Annars getum við Halldór verið sammála um eitt, þó að við séum annars sammála um fátt. Ég vona að allir aðilar nái sáttum svo að bænum okkar verði vel stjórnað.
Við Kópavogsbúar eigum það skilið.
Það er rétt Kópavogsbúi,
Það er rétt Kópavogsbúi, Atvinnu- og upplýsinganefnd er varla jafn veigamikil nefnd og félagsmálaráð. Það hefur því varla verið mikið stórlæti af Elfi að bjóðast til að taka þá fyrrnefndu. Hún er eins og áður segir lögræðingur með framhaldsnám á upplýsingatæknisviði og þar að auki viðskiptafræðingur. Það sýndi hins vegar mikinn samstarfsvilja, þar sem sú nefnd hefði væntanlega þurft að sitja uppi með Kópavogsbrúarhugmyndina,sem lendir nú hjá pilti sem ekki hefur reynslu á slíkum vettvangi.
Afhverju er svona mikilvægt
Afhverju er svona mikilvægt að hún sé "lögræðingur með framhaldsnám á upplýsingatæknisviði og þar að auki viðskiptafræðingur"?
Þetta hljómar eins og eitthvað sem nýkjörinn borgarstjóri Reykjavíkur myndi láta út úr sér í lélegri sjónvarpsþáttaröð.
Mér finnst þetta vera menntahroki.
Munurinn er sá að
Munurinn er sá að "pilturinn", sem er reyndar um þrítugt, er bæjarfulltrúi en hún ekki. Það hefur meira að segja en menntun, enda er ekki neinnar ákveðinnar menntunar krafist fyrir nefndarsetu. Fólk getur ekki menntað sig til nefndarformennsku.
Svo getur verið að meirihlutinn hafi ekki viljað fá manneskju í atvinnumálanefndina sem var á móti helstu hugmynd Samfylkingarinnar í atvinnumálum úr kosningabaráttunni. En það eru svo sem bara getgátur hjá mér.
Ég hefði viljað sjá Elfi sýna þann samstarfsvilja að taka boðinu um félagsmálaráð, held að hún hefði getað orðið öflug þar.
Lýðræði, gegnsæi og heiðarleiki
Það var ekki margt sem heillaði í síðustu bæjarstjórnarkosningum í Kópavogi. Hvorki menn né málefni. Þetta var samdóma álit hóps Kópavogsbúa sem hefur hist í morgunkaffi mánaðarlega. Í bríaríi var þeirri hugmynd slegið fram að bjóða fram Grínflokkinn, löngu áður en Jón Gnarr tók flugið. Ný Kópavogsbrú Samfylkingarinnar í Kópavogi var krufin, og það var ekki slæmt að í hópnum voru 8 einstaklingar sem höfðu áratuga reynslu og góða menntun á fjármála og byggingarsviði. Hópurinn var sammála um að ef slíkt kosningatromp hefði komið fram í nágrannalöndum okkar, hefði viðkomandi flokkur verið niðurlagður. Við settum saman tillöguna um Nýja Kópavogsveginn, þar sem bilaðir bílar yrðu keyptir, fjármagnaðir með ,,ódýrum lánum" og leigðir í félagslegum tilgangi. Tillaga Grínflokksins hefur sennilega verið raunhæfari en Nýja Kópavogsbrúin.
Útkoma kosninganna ætti að vera alvarleg áminning til fjórflokksins og stjórnmálamanna. Krafan er um lýðræði, gegnsæi og heiðarleika. Grein þín hér að ofan bendir til þess að fram sé kominn nýr stjórnmálamaður hér í Kópavogi sem hafi burði til þess að takast á við þau mál sem vinna þarf. Minnir mig á Lilju Mósesdóttur sem setur fagleg sjónarmið ofar flokkshlýðni. Það eru stjórnmálamenn með slíkan manndóm sem við þurfum á að halda, af hinum höfum við nóg af.
Ég gef ekkert fyrir kvak flokkshænsnanna Ingibjargar og Magnúsar. Það eru flokkshænsni allra landa sem styðja óhæfufólk til valda, í stað þess að skoða hluti með gagnrýnni hugsun, koma með tillögur og veita valdhöfum réttmætt aðhald.
Auðvita finnst þér félagslegt húsnæði óþarfi Sigurður!
Var að kanna það og í Kópavogi eru um 350 Íbúðir í félagslegum búsetuúrræðum á vegum bæjarins. Í Reykjavík eru þessar íbúðir um 2160.
Og nú þegar umræðan er um að fólk sé að missa húsnæði sitt hægri og vinstri þá finnst sjálfstæðismönnum það algört aukaatriði að tryggja þeim sem lenda undir húsnæðismöguleika. Finnst sennilega best að þetta fólk flytji bara í önnur sveitarfélög.
Og fyrst að Sigurður hefur kynnt sér "Kópavogsbrúnna" svona vel, jafnvel krufið hana til mergjar með 8 félögum sínum, þá kemur mér á óvart þessi líking hans við félagaslegar bifreiðar. Því í þessari tillögu felst nú m.a. að klára þetta húsnæði til að skapa hér vinnu. Húsnæðið yrði síðan selt út á almennum markaði, leigt út á almennum leigumarkaði, leigt út sem kaupleiguíbúðir sem fólk gæti eignast eftir ákveðin tíma. Það var nú ekki talað mikð um félagslegar leiguíbúðir en þar mætti Kópavogur standa sig betur.
Öðru nenni ég nú ekki að svara!
Aðalatriði og aukaatriði
Þó að hrunið okkar sé slæmt, þá gengu Þjóðverjar í gegn um mun stærra og alvarlega hrun á sínum tíma, seinni heimstyrjöldina. Þeir þurftu að byggja samfélag frá grunni og taka á þeim þáttum sem olli því að öfgaöfl náðu völdum. Þeir lögðu áherslu á lýðræði, gensæi og heiðarleika. Þar eru jafnaðarmenn virkasta aflið.
Ég spurði virtan þýskan lögfræðing sem lifði síðari heimstyrjöldina, hvernig stæði á því að Þjóðverjar studdu Hitler jafn dyggilega og raun bar vitni. Hann sagði mér frá sinni fjölskyldu og áhrifum stríðsins á hana. Enginn þeirra studdi Hitler. Hann endaði frásögn sína á því að segja:
,,Í hvert skipti sem þú styður flokksformanninn þinn, eða flokkinn þinn, þegar samviska þín segir annað, styður þú Hitler allra tíma"
Sem betur fer er stór hópur og vaxandi hópur fólks sem lætur fagleg sjónarmið vega meira en áherslur og framganga flokkanna. Fyrir flokkssauði allra flokka er slíkt fólk ógnun. Þess vegna er Elfur Logadóttir ógnun við þig og Ingibjörgu Hinriksdóttur.
Eins og áður gerir þú lítinn greinarmun á aðalatriðum og aukaatriðum. Elfur bauð sig fram til þess að hafa lýðræði, gegnsæi og heiðarleika að leiðarljósi. Hún hefur örugglega haldið að fagleg sjónarmið yrðu sett á oddinn, og hún hefur örugglega orðið fyrir vonbrigðum. Hún hefði örugglega orðið jafn óánægð ef hún hefði boðið sig fram fyrir hina flokkana.
Siggi Steina
Síðustu 3 ár hefur Siggi einbeitt sér að því að lítillækka Jón Júl.
Svo sneri hann sér að Ingibjörgu og sagði að hún hafi verið tekin af listanum vegna oddvitans.
Nú ræðst hann á Magnús Björgvinsson með Hitler að vopni.
Mikið er spennandi að sjá hvar SÞ heggur næst - eitt er víst það verður ekki í raðir íhaldsins!
Lögmál Godwins segir að sá
Lögmál Godwins segir að sá sem líkir einhverjum við Hitler eða stuðningsmenn hans á internetinu í alls óskyldri umræðu, sé þar með orðinn marklaus í umræðunni. Sigurður Þorsteinsson sannar það ágæta lögmál.
Þar með er umræðunni lokið af minni hálfu.
Missum ekki sjónar af kjarna málsins!
Á tímum þar sem allt liggur undir, ALLT, þá eru skilaboð oddvita og varaoddvita: "það þarf ekki endilega að standa við þetta kosningaloforð að loknum kosningum" ALGERLEGA ÓÁSÆTTANLEG!
Og ef þetta er aðeins toppurinn á ísjakanum þá er þetta óverjanlegt! Þá skipta athugasemdirnar um nefndarstörf eða engin nefndarstöf engu máli. ENGU.
Það er mín skýlausa krafa að mínir skattpeningar séu notaðir af skynsemi, og að það fólk sem þiggur greiðslu fyrir störf sín í bæjarráði, vinni sitt starf af virðingu fyrir þeim sem þeir eiga að þjóna, fólkinu í bæjarfélaginu .... ekki flokknum, hver sem hann er.
Ég hef deilt við Elfi um ýmis málefni og þau átök hafa oft ekki verið þægilegt þó að athugasemdir hennar hafi verið réttmæt. Ég þakka henni núna fyrir að standa upp og tala máli réttlætis og heiðarleika. Til þess þarf kjark!
Bráðræði og alvarleg mistök Elfur
Hver sem raunveruleikinn er um það sem þú lýsir Elfur, hvort sem þín upplifun ein og sér væri tekin fullgild eða hliðsjón væri höfð af mismundi upplifunum þeirra sem hlut ættu að, og hvort sem við gerðum ráð fyrir að mismunandi skilningur væri til staðar á sömu samtölum eða að þú skyldir allt fullkomlega og rétt sem allir segðu, þá ert þú hér alvarlega að hlaupa á þig.
Hugmyndir um lýðræði og hugmyndir um fullkomleika við ákvarðanir eru einfaldlega andstæður. Í leit sinni að fullkomnum ákvörðunum hafa mennirnir reynt hina menntuðu einvalda og gælt við einræði hinna fullkomnu heimspekinga Platóns sem í raun er uppskrift alræðisríkisins. En þegar opnað er fyrir lýðræðið, jafnræðið og lýðræðislegar ákvarðanir flæðir ófullkomleikinn inn því við öll erum ófullkomin sem tökum þátt í því, janfvel það sem virðist kaos, átök og heimska fyllir rýmið, en það er vegna þess að ekkert lýðræði er til staðar ef við ætlum að sortera eftir okkar smekk frá borðinu allt sem er ófullkomleiki í okkar eigin persónulegu augum.
Lýðræði, kaos og ófulkomleiki eru einfaldlega að vissu marki óaðskiljanlegir samferðamenn sem við verðum að læra vinna með. Lýðræði ferðast ekki eitt og sér án hinna.
Opnir mánudagsfundir Samfylkingarinnar í Kópavogi sem haldnir hafa verið óslitið í áratugi, fyrst í Alþýðuflokknum og svo Kópavogslista og loks í Samfylkingunni eru einstakur vettvangur ófullkomleikans þ.e. lýðræðisins, sem merkilegt nokk - skilar samt alltaf af sér að lokum en kerfst þolinmæði, umburðalyndis og þrautsegju - og dús við ófullkomleikann.
Þegar ISG tók uppá því að handvelja í málefnanefndir á landsvísu fyrir 5-6 árum í lokaða hópa sagði ég mig af þeirri ástæðu úr Samfylkingunni á landsvísu en ekki úr félaginu í Kópavogi - vegna opinna lýðræðsilegra vinnubragðanna sem þar voru í heiðri höfð, með opnum mánudagsfundunum og opnu málefnastarfi með aðkomu allra sem vildu. - Það er lýðræði en líka vesen og ófullkomleiki.
Hvað sem líður niðurstöðum og hvort sem ég hef verið sammála eða ósammála þeim er þetta það mikilvægasta sem Samfylkingin á og á hún þó margt verðmætt, það eru opinn vinnubrögð og lýðræðisvenjur Samfylkingarinnar í Kópavogi með opna mánudagsfundina fyrir kjölfestu.
Ógerningur er fyrir þig að dæma af alvöru á svo stuttum reynslugrunni, í það minnst er mín reynsla allt önnur en þín á löngu árabili - og vel að merkja þá varð ég aldrei uppáhalds neins þarna og oft uppá kannt (bý nú í Reykjavík).
- En þú hleypur alvarlega á þig með því að leggja andstæðingunum svo sterkt vopn í hendur, andstæðingum þessara lýðræðislegu vinnubragða sem Kópavogsfélagið hefur varðveitt óslitið og reyst sitt starf á, og andstæðingum jafnaðarstefnunnar.
Finnið nú flöt til að sættast - og draga ögn í land - í allra þágu og þó fyrst og fremst Kópavogsbúa, lýðræðsins og jafnaðarsetfnunnar.
Vont er vandar høggid
Jæja jæja systir god:
vont er vandar høgg piskarans
verri eru tho bit vina
svo for sem grunat mig havdi
thvi hvar sem vald hefur um vøll ridid
og gagnrynislaust gengid
thar hefur jahird sauda
saman safnast
Skrá nýja athugasemd